Skip to content

Hartmann von Aue :: Knowledgebase Portal

Narrow screen resolution Wide screen resolution Increase font size Decrease font size Default font size
einen Buchstaben wählen:
| a | â | b | c | d | e | ë | ê | g | h | i | î | j | k | l | m |
| n | o | ô | œ | p | q | r | s | t | u | ü | û | w | z |

Iwein

1222 guoter gâchspîse gnuoc:
        des saget er ir gnâde und danc.
        dô er gâz und getranc,
        dô huopz gesinde grôzen schal
        ze bêden porten über al,
1227 als sîz im niht wolden vertragen
        der in den herren hete erslagen.
         Sî sprach 'her Îwein, hœret ir?
        sî suochent iuch, nû volget mir,
        und enkumt niht ab dem bette.
1232 iu stât diz dinc ze wette
        niuwan umbe daz leben.
        den stein den ich iu hân gegeben,
        den besliezet in iuwer hant.
        des sî mîn sêle iuwer pfant
1237 daz iu niht leides geschiht,
        wande iuch vürnamens nieman siht.
        nu wâ mite möht iu wesen baz,
        dan dazs iu alle sint gehaz,
        und ir sî seht bî iu stân
1242 unde drônde umbe iuch gân,
[ zurück ]