Skip to content

Hartmann von Aue :: Knowledgebase Portal

Narrow screen resolution Wide screen resolution Increase font size Decrease font size Default font size
einen Buchstaben wählen:
| a | â | b | c | d | e | ë | ê | g | h | i | î | j | k | l | m |
| n | o | ô | œ | p | q | r | s | t | u | ü | û | w | z |

Gregorius

2251 ez enwart nie wünne merre
        dan diu vrouwe und der herre
        mit ein ander hâten,
        wan si wâren berâten
        mit liebe in grôzen triuwen;
2256 seht, daz ergie mit riuwen.
        er was guot rihtære,
        von sîner milte mære.
        swaz einem manne mac gegeben
        ze der werlde ein wünneclîchez leben,
2261 des hâte er gar des wunsches wal:
        daz nam einen gæhen val.
         Sîn lant und sîne marke
        die bevridete er alsô starke,
        swer si mit arge ruorte
2266 daz er den zevuorte
        der êren und des guotes.
        er was vestes muotes:
        enhæte erz niht durch got verlân,
        im müesen wesen undertân
2271 swaz im der lande was gelegen.
[ zurück ]