Skip to content

Hartmann von Aue :: Knowledgebase Portal

Narrow screen resolution Wide screen resolution Increase font size Decrease font size Default font size
einen Buchstaben wählen:
| a | â | b | c | d | e | ë | ê | g | h | i | î | j | k | l | m |
| n | o | ô | œ | p | q | r | s | t | u | ü | û | w | z |

Iwein

8030 sî sprach 'nû sî er willekomen.
        ich wil in harte gerne sehen,
        swie daz mit vuoge mac geschehen.
        genc hin zuo im unde ervar,
        wil er her, od sol ich dar?
8035 daz sî: wan ich bedarf sîn.
        er gienge nâch mir, bedorfter mîn.'
         Vil schiere brâht in vrou Lûnete.
        er vuor swie sî in varen tete,
        gewâfent daz im nihts gebrast.
8040 si enpfie den wirt vür einen gast.
        und bî dem êrsten gruoze
        viel er ir ze vuoze
        und enhete doch deheine bete.
        dô sprach vrou Lûnete
8045 'vrouwe, heizet in ûf stân:
        und als ich im geheizen hân,
        sô sult ir lœsen den eit.
        ich sag iu mitter wârheit
        daz diu helfe untter rât
8050 niuwan an iu einer stât.'
[ zurück ]