einen Buchstaben wählen: | a | â | b | c | d | e | ë | ê | g | h | i | î | j | k | l | m | | n | o | ô | œ | p | q | r | s | t | u | ü | û | w | z | [ zurück ]
Erec3951 und doch diu bette scheiden:er enwolde si bî im niht ligen lân. slâfen begunden si dô gân. nû lâgen si besunder. diz was iedoch ein wunder, 3956 daz er durch deheinen zorn im den muot hete erkorn daz er ein sô schœne wîp meit. von sorgen grôzen kumber leit der vrouwen gemüete 3961 durch triuwe und durch güete, wie im diu rede würde kunt: wan er verbôt daz ir munt ze sprechenne iht ûf kæme, swaz si vernæme, 3966 als ich iu ê gesaget hân. doch enhete siz niht verlân: dâ mite hete si in verlorn, sô daz er ir durch den zorn ze geselleschefte niht phlac, 3971 wan er sunder âz und lac. |