einen Buchstaben wählen: | a | â | b | c | d | e | ë | ê | g | h | i | î | j | k | l | m | | n | o | ô | œ | p | q | r | s | t | u | ü | û | w | z | [ zurück ]
Erec2609 nû mohte sich gelîchender schal von den scheften niuwan dâ von windes kreften ein walt begunde vallen. dô tete erz vor in allen, 2614 Êrec fil de roi Lac, wande er den mântac maneges ros erledegete dâ. diu liez er von der hant sâ, daz er ir deheinez nam, 2619 wan er dar niene kam ûf guotes gewin. dar an kêrte er sînen sin, ob er den prîs möhte bejagen. ich wil ouch iu zewâre sagen, 2624 sîn lîp wart lützel dâ gespart. dô der turnei stânde wart, dô sach man in sô dicke niender als in der dicke, dâ er muoste emphâhen unde geben. 2629 man sach in manlîche leben. |